PASAMBAHAN NAGARI KAJAI PASAMAN BARAT

 I.      ALUE MOMBAO MAKEN

Sebelum makan biasanya sipangka/ibubapo bertanya kepada Niniak Mamak yang sudah datang pada suatu acara, apakah dari pihak Niniak Mamak masih ada yang ditunggu kehadirannya.

a.    Ibu Bapo Batanyo Barisan Niniak Mamak.

-       Sipangka  :

Mano Ompek Suku ..  Mangkok lah Mak Mongecek kito sobuak, manolah kecek tu singkek nyoh, tapi somantangpun singkek mo nak disampe ge mangko monjadi.

-       Niniak Mamak :

Sampei ge lah

-       Sipangka  :

Manolah dihari nen somalom kinin go, janjang di tingkek bondue di topuak lapiak takambang, lah duduak kito sa amparen lah togak kito so pomantang manolah kinin namonyo tu dari  kami ibu bapo kok tuah jalen do lah buliah ke diansua kok tuah kato do lah buliah ke disobuik, iyolah kinin tu teh namonyo tontang barisan Niniak dengan Mamak, apo kok lai nen jauah ke dinanti dokek nen ke tibo. Sokitu nyoh ompek suku.

-       Niniak Mamak :

Olah sampe do ibu bapo ... tontang rundingen ibubapo nen kotongah cako tu lah siang nen bak ari, lah torang nen bak bulen, tapi sungguhpun mode itu, lomak lauak iyo kopomasak, lomak kecek iyo dek lega bunyi, sobolum kato ke dijowob sobolum gondang ke ditingkah, nak bulek aie tu iyo ko pombuluah kok bulek kato iyo ko mufoket, dek kami disiko lai boduo ngen botigo, bo pariah kami sobonta dolu moncari kato nen sopoket rundingen nen sosuei. Monanti ibu bapo sokotiko.

-       Sipangka :

sikap monunggu kami niniak mamak

(Bo pariahlah Niniak Mamak sebentar mencari kata yang sepakat, setelah dapat kata yang sepakat maka)

                  

 

 

 

-       Niniak Mamak :

Ibu bapo ... mangkolah ibubapo bak papatah urang tuo-tuo,

Pasanglah pukek dimuaro

Dipasang dek anak mudo-mudo

tolambek kami monjawob kato ibu bapo

buken mokosuik disongajo

tapi moncari rundingen nen soiyo,

yo kinin tu lah kami ranai ditapak tangen lah kami jujuang dikapalo, lah dapek kato nen sopoket lah dapek rundiang nen sosuei, lah bulek aie dipomuluah lah bulek kato  dimufoket. Aku juo ko momjowobnyo yoh. manolah sopanjang rundigen ibubapo cako tu, janjang di tingkek bondue di topuak lapiak takambang, lah duduak kito sa amparen lah togak kito so pomantang manolah kinin namonyo tu dari  barisan ibu dengan bapo kok tuah jalen do lah buliah ke diansua kok tuah kato do lah buliah ke disobuik, iyolah kinin tu teh namonyo tontang barisan Niniak dengan Mamak, apo kok lai nen jauah ke dinanti dokek nen ke tibo, ken mode itu cako do ibubapo.

-       Sipangka : ( iyo ompek suku )

-       Niniak Mamak :

tontang dek itu jowobnyo do bopanjang panjang do

Urang padang bokudo limo

Hondak monyabik padi sipuluik

Nen ke datang lai juo

Tapi nen disiko lah umpamo cukuik

(Atau)

Pinang sobatang kinilah tuo

Daun nen kombang kinin kucuik

Kok urang nendatang mungkin lai juo

Tapi nen disiko lah umpamo cukuik

(Atau)

kalau indok disiko lah umpamo disiko, misalnyo tuah jalen kok diansua ansualah kok tuah kato nak monyobuik sobuiklah. Hanyo sogitunyo ibubapo.

-       Sipangka : ( mulai lah Sipangka mengerjakan apa yang akan dikerjakan )

(atau kalau masih ada yang ditunggu)

 

-       Niniak Mamak

Nampak nyo lai juo nen ke di nanti le, mo nanti juo ibu bapo sokotiko dolu.

-       Sipangka :

Jadih Ompek Suku monanti kami sokotiko.

( Kalau sudah lama menunggu tapi yang di tunggu masih belum datang maka Niniak Mamak harus memulangkan kata lagi ke Sipangka )

-       Niniak Mamak :

Ibu bapo .. manolah cako Ibu Bapo lah bosoba dalom ponantien. Nampak-nampak nyo nen ke tibo tu mo lai juo teh nyo. Cuma lah dihereang kanen kokida yo nen olun datang do lah umpamo datang kok tuah jalen lah buliah di ansua.  Sogitu nyo ibu bapo.

 

b.   Manyuruah Makan

-       Sipangka :

Mamak mongecek juo kito sobuak le, manolah kecek tu singkek nyoh , tapi somantangpun singkek mo nak disampe ge mangko jadi.

-       Niniak Mamak : ( sampei ge lah)

-       Sipangka:

Manolah kinin tu namonyo lah tumbuah nen bak boniah lah tebik nen padi, tumbuah lah dari silang nen bopangka karakok nen bo junjuang. Iyolah tumbuah sarupo iko kinin, lah tolotak pinggen soroto piriang boisi nasi cukuik dengen samba nyo , bosusun pulo galeh  soroto cawen borisi ayie kasadonyo, lah basusun di ruang tangah, lah sampe pulo ko ruang topi. Iyolah kinin tu kok nasi dengen samba nen to tolotak kami dari sipangkalen nak minto di maken aie nen to edang nak minto di minum. To tumbuak kato ko mamak tapi so isi rumah go. Sokitunyo mamak.

-       Niniak Mamak :

Lah sampe do ibu bapo, ... tontang rundingen ibubapo nen kotongah cako kok kateh lah to amba gadang kok ko bawah lah to kesiak bulen, tapi sungguah pun sorupo itu lomak siriah lega carano lomak sodah tu dek palik tangen. sobolum kato ke dijowob sobolum gondang ke ditingkah, nak bulek aie tu iyo ko pombuluah kok bulek kato iyo ko mufoket, dek kami disiko lai boduo ngen botigo, bo pariah kami sobonta dolu moncari kato nen sopoket rundingen nen sosuei. Monanti ibu bapo sokotiko.

 

-       Sipangka :

Monanti kami sopanjang adet.

-       Niniak Mamak :

( Lalu Niniak Mamak membawa kata ke mufakat / Bopariah, kalau sudah dapat kata yang sepakat )

-       Niniak Mamak :

Mano Ibubapo,

tolambek juo kami monjawek kato Ibubapo cako tapi bukan mokosuik di songajo hanyo moncari kato nen soiyo

ilie mudiak kebo mombao podati

sorek muaten buah palo

Lah ilie mudiak kato nen bocari

Aku juo ke monjowobnyo

Manolah tadin tu ponitahen ibu bapo ko tongah tu iyo indo ke botitih batang botikom jojak doh, kok dititih batang takuik tokoliciak ko tikom jojak takuik indo kono. kok indok toulang bak monyopuah kok indok tobaliak bak mamanggang mo rila dengan moof ko ibu bapo, Sopanjang titah Ibubapo cako iyo lah tumbuah nen bak boniah lah tebik nen padi, tumbuah lah dari silang nen bopangka karakok nen bo junjuang. Iyolah tumbuah sarupo iko kinin, lah tolotak pinggen soroto piriang boisi nasi cukuik dengen samba nyo , bosusun pulo galeh  soroto cawen borisi ayie kasadonyo, lah basusun di ruang tongah, lah sampe pulo ko ruang topi. Iyolah kinin tu kok nasi dengen samba nen to tolotak dari sipangkalen nak minto di maken aie nen to edang nak minto di minum tumbuak kato ko aku, mo isi nyo untuk kito bosamo. Itu cako do Ibubapo.

 

 

-       Sipangka : ( iyo Ompek Suku)

-       Niniak Mamak :

Sopanjang buah kobonaren dari ibu bapo tu, lah di bao kato ko mufoket lah dibao rundiang nen boiyo. lah kami goligo bulek lah kami ompiang picak. Kok bulek aie iyolah kopomuluah kok bulek kato iyolah komufoket. kok bulek lah bisa digolek ge kok picak lah bisa dilayang ge. Manolah jowobnyo iyo dari kami indo lah bopanjang-panjang doh ( Boleh diisi dengan pantun )

Godang aienyo si batang nango

Hanyuiklah sokolupak kayu jati

Sado rosoki nen tolotak ko muko

Alhamdulillah lah Samo kito torimo dengan sonang hati.

Urang borulak poi kopoken

Hari ujen botuduang daun

Nasi ngen samba nen tolotak samo di maken

Aie nen to edang samo diminum

( Atau boleh juga langsung )

Manolah kinin tu kok nasi samo kito maken kok aie samo kito minum, mulai lah dari sinen kami ansua pulo dari siko.

 

c.    Salah Silik Molotak Jamba

-       Sipangka :

Lai juo go le ompek suku, bak nyo urang tuo-tuo go kok monconcang indo sokali sudah kok momancuang indo sokali putuih. Mo lai juo nen kadi sampei ge le. Manolah Allah bo sifet kodim manusia bosifet khilof. Ontah dek rumah jorok manjorok ontah dek ruangen liku –boliku, ontah dek dindiang nen mongolom ontah tolamun dek  urang banyak, iyo nak minto ditiliak di pandangi dek korono janang kami mudo matah, kok kurang nak kami tukuak kok senteang nak kami bilai Iyo tontang jamba kami nen ko tongah teh go. Kok nasi nen kurang bumbuang kok samba nen kurang garom kok aie nen kurang tawa. Iyo kok salah silik dalom molotak, kok indo tolotak di tompek nyo patuik kanen tolotak ko kida patuik di tongah tolotak ko topi indo tolotak ditompeknyo kok indo bak somuik bobarih. Kami ateh namo sipangka minto moof soroto minto izin kopado Niniak Mamak soroto dunsanak nen hadir di olek malom kinin ko. Sokitu nyo Ompek Suku.

-       Niniak Mamak :

( kalau perlu rasanya di bawa ke mufakat maka bermufakat Niniak Mamak, Kalau tidak langsung saja dijawab )

Manolah kato dari Ibubapo tu iyo Allah bo sifet kodim manusia bosifet khilof. Ontah dek rumah jorok manjorok ontah dek ruangen liku –boliku, ontah dek dindiang nen mongolom ontah tolamun dek  urang banyak, iyo nak minto ditiliak di pandangi dek korono janang  mudo matah, kok kurang nak kami tukuak kok senteang nak kami bilai iyo tontang jamba kami nen ko tongah teh go. Kok nasi nen kurang bumbuang kok samba nen kurang garom kok aie nen kurang tawa. Iyo kok salah silik dalom molotak, kok indo tolotak di tompek nyo patuik kanen tolotak ko kida patuik di tongah tolotak ko topi indo tolotak ditompeknyo

Mo dari pihak ibu bapo nak minto moof soroto minto izin, ken mantu cako do....

Iyo sotontang kato nen ibu bapo sampe ge cako tu indo rasonyo ke bao bo pariah, Mo kok dilayok pandang ko kanen lai bomuko jeniah nampaknyo nyo. Kok dilayok ge pulopandang kokida lai pulo bo hati suci nyoh. Nen kojowobnyo ndo bopanjang-panjang doh.

Urang parik mombolah roten

Tiok dibolah sipi juo duo

Kok salah silik ibubapo dalam molotak ge idangen

Lah kami bori izin dari somulo

( atau langsung juga boleh)  

Iyo dek manusia bo sifet khilof namo nyo mo lah kami moof ge lah izin ge. 

 

d.   Mo Angkek Jamba

-       Sipangka :

Ompek Suku, iko nampak nyo ujen toduah kabuik lah torang bapo lah kiro-kiro bisa kami tariak jamba go ko dapua.

(atau)

Ompek Suku, nen cako hari paneh jomua lah kami koka, kininlah mo lah lindo dibangkik jomua ko bapo lah kiro-kiro mamak.

-       Niniak Mamak :

Kok itu iyo lambuik sudah iriak solosei mo mombubo pulo teh kito le. Maken sudah minum solosei mo ndok bapo ditariak le.

(atau)

Kok siriah nak suruak ko gagang, kok pinang nak suruik ko tampuak, misalnyo tontang nen dek itu lah kami lenggang ko kiri ngen ko kanen raso nyo indo bapo le...

 

II.     ALUA BATANYO SASAMO NINIAK MAMAK

a.    Bo Pariah Tontang Kohadiren Niniak Mamak

-       Niniak Mamak :

Mak datuak, iko lah tibo pulo dari pokok sipangkalen iyo monolah tontang korejo nen ke kito kakok kinin go. Iyo sotontang dari pado sobarisan Niniak dengan Mamak apo ko lai nen jauh ke tibo nen dokek ke dinanti kok tuah korejo lah bisa kami kakok ko tuah jalen lah bisa kami ansua. Sokitu dolu Mak Datuak.

 

-       Mak Datuak :

Lah sampai tu Mamak, ( kalau masih ada tempat bermufakat, maka ucapkan kata bermufakat lagi, kalau tidak ada maka langsung di pulangkan kembali )

Baiko lah mak nampak nyo ndak lai nen kedinanti le ko tuah korejo lah bisa dikakok, pulangkan lah dek Mamak kato tu baliak.

 

b.   Bo Pariah Tontang Jamba/Edangen

-       Niniak Mamak :

Mak Datuak, Ibaret mounyi durien lah pumpang miang jatuah nyo, dari pokok sipangkalen juo. Iyo tontang  jamba nen kotongah, berupo nasi nen tolotak aie nen to edang. Kok nasi nen tolotak nak minto dimaken kok aie nen toedang nak minto di minum tumbuak kato ko aku, mo isi nyo untuk kito bosamo. Sokitunyo Mak Datuak.

-       Mak Datuak :

Lah sampai tu Mamak. (kalau masih ada tempat bermufakat, maka ucapkan kata bermufakat lagi, kalau tidak ada maka langsung di pulangkan kembali )

Mak sopanjang kato Mamak cako. Yo nampak nyo dek kito ko iyo kok rosoki borupo nasi nen tolotak nak minto dimaken kok aie nen to edang nak minto diminum ken itu tadi tu. Kok nasi tu samo-samo kito maken kok aie tu samo-samo kito minum. Pulang ge kato tu baliak dek mamak kok posen do ndok boturuik le, sokitunyo.

 

III.     ALUA BOTANYO NINIAK MAMAK DENGAN IBU BAPO

a.    Botanyo Niniak Mamak ko Ibo Bapo

-       Niniak Mamak

Ibubapo, mongecek kito sabuak manolah kecek tu singkek nyo, tapi somantang pun singkek mo nak disampe ge mangko jadi. Manolah di hari nen somalom kinin go iyo jonjang nen ditingkek, bondue nen ditopuak, lapiak tokombang, lah duduak kito sohamparen, lah togak kito sopomatang, kok litak kito lah dapek nasi kok hauih kito lah dapek aie, mo lah habih pulo rokok nen sobatang, Cuma nen de angen olun jadi nen di amal olun pocah, mak jangen siang ko bohabih hari kok malom ko bohabih minyak, kok tuah jalen ko lah buliah diansua kok tuah kato ko lah buliah di sobuik. Hanyo sokitu dulu ibu bapo.

-       Simpangka

Olah sampe do mamak, sopanjang rundingen mamak tadi, iyo kok didonga lah bobunyi kok diliek lah borupo, tapi sungguahpun mode itu mak kateh samo sopucuk mak kobawah samo sourek bopariah kami sobonta dolu moncari kato nen soiyo rundingen nen sosuei.

-       Niniak Mamak (lah didalom parik nen bolingka teh tunyo)

-       Simpangka

Mamak tolambek monjawek rundingen mamak cako tapi buken mokosuik disongajo tapi monacri kato nen soiyo rundingen nen sosuei. Manolah rundingen mamak cako tu iyo bondue ditopuak, jonjang ditingkek, lapiak tokombang, lah duduak kito sohamparen, lah togak kito sopomatang, kok litak kito lah dapek nasi kok hauih kito lah dapek aie, mo lah habih pulo rokok nen sobatang, mak jangen siang ko bohabih hari kok malom ko bohabih minyak, kok tuah jalen ko lah buliah diansua kok tuah kato ko lah buliah di sobuik. Lah kami goligo bulek lah kami ompiang picak lah dapek pulo kato nen sosuei, kok tuah jalen do lah buliah diansua nyo kok tuah kato do lah buliah di sobuik nyo. Sokitunyo Mamak.

-       Niniak Mamak

Alhamdulillah lah.

b.   Botanyo Corano Ken Siriah

-       Niniak Mamak :

Ibubapo, mongecek kito sabuak manolah kecek tu singkek nyo, tapi somantang pun singkek mo nak disampe ge mangko jadi. Ibaret janji lah tibo di hari nyo ibaret sumbayang lah tibo pulo di wokotunyo. Jadi kinin tu tontang carano ken siriah lah tibo pulo gunonyo. Manolah kinin tu tontang carano ken siriah kok nen punyo sungguah lah Niniak dengan Mamak tapi nen mo impo bogubalo nyo iyolah Ibu dengan bapo. Nen kinin ko dek carano ken siriah lah tibo di gunonyo iyo nak di kalua ge soreto langkok gonok dengan isinyo mak samo-samo kito poguno ge disiko. Sokitunyo ibu bapo.

 

 

-       Sipangka :

Lah sampei tu Mamak, sopanjang titah Mamak kami, iyolah rancak bunyi nen kami donga haluih rono nen kami liek tapi sungguah pun boitu lomak siriah lega carano lomak lauak ko pomasak lomak kato ko mufoket. Nak bulek aie ko pombuluah nak bulek kato ko mufoket. Monanti Mamak kami sokotiko kami bao kato ko mufoket dolu kok siapo pulo lah beko ke momulang ge kato Niniak Mamak tu.

-       Niniak Mamak (Lah pasa nen biaso tu nyo)

-       Sipangka (maka mulailah ibu bapo bermufakat, setelah itu pulang kan kembali).

Mamak Kami, tolambek kami monjawek kecek Mamak. Buken mokusuik disongajo tapi moncari kato nen sopoket, manolah kinin tu lah dapek kato sopoket dari kami  sipangka ko aku juo ko monjowob kato Mamak kami tu nyoh. Manolah cako rundingen Mamak cako tu ibaret janji lah tibo diharinyo ibaret sumbayang lah tibo di wokotunyo. Tibo di carano ken siriah lah tibo pulo gunonyo. Manolah kinin tu kok nen punyo sungguahlah Niniak dengan Mamak tapi nen mo impou bogubalonyo Ibu dengan bapo. Jadi kinin lah tibo gunonyo nak dikolua ge kami soroto dengan isinyo nak samo-samo kito poguno ge di siko. Ken itu cako  Mamak.

Alhamdulillah lah carano ken siriah siap dari somulo bisa kito guno ge basamo-samo. ( sambil memberikan carano ke Niniak Mamak)

-       Niniak Mamak :

( Allhandullah bak nyo urang go.... gule pangek pucuak paku kondak dapek pintak bolaku nampak nyo)

c.    Bodobeh

-       Niniak Mamak :

Ibubapo, lai juo nen ke disampe ge ke Ibubapo le. Iyo bak urang tuo tuo

bosabuang ombaknyo pantei puruih

Urang monjua udang basah

kok momancuang ndok sokali putuih

kok bokato ndo sokali sudah

lai juo nen kadisampei ge le, Manolah kinin tu sobarisen Niniak dengan Mamak lai nen ke diatak etong ge jadi nak minto izin kami ko ibu bapo. Sokitunyoh.

-       Sipangka :

Sobolum kato dijowob mo bopariah juo kami sobonta dolu. ( setelah itu pulangkan kembali). Niniak Mamak tolambek sobonta go mombaleh kecek Niniak Mamak kami dek moncari kato nen soiyo. Iyo dek lai nen ke diatak etong ge antaro Mamak dengan Mamak nak minto izin ke kami Ibubapo. Lah kami izin ge sokitu nyoh.

 

d.   Ba Tanyo Mukasuik

-       Niniak Mamak :

Ibubapo, mongecek juo kito baliak manolah kecek tu singkeknyo tapi somantangpun singkek nak disampe ge juo mangko jadih. Tontang korejo nen ke kito kakok, manolah malom botambah laruik juo jadi itulah kinin tu. Kok siang jangen lah bo abih hari kok malom jangen lah bo abih minyak. Lai nen tokona di hati nen toilen di mato bona nak mongotongah ge mokosuik nak monyampei ge, ko hadapen ibu dengan bapo. Apolah bisa bona go kami kotongah ge mokosuik go mokosuik kami sampei ge ko hadapen ibu dengan bapo, sokitu dolunyo Ibubapo.

-       Sipangka :

Lah sampe do Mamak, sopanjang rundingen mamak nen kotongah cako tu iyo olah dalam adat nen bopakei lah dalom cupak nen boisi, tapi sungguah pun sorupo itu lomak siriah lega carano lomak kato dek lega bunyi, dibao kaato ko mufoket dolu monanti mamak dolu sokotiko.

-       Niniak Mamak (lah dalom ragi nen tokombang tu nyo)

-       Sipangka

( Lalu dibawa kata ke mufakat, setelah itu pulangkan kembali )

Mamak, tolambek kami monjawek kato niniak mamak tadi bukan mukosuik di songajo tapi moncari kato nen sosuei. Manolah kato niniak mamak tadi, Tontang korejo nen ke kito kakok, manolah malom botambah laruik juo jadi itulah kinin tu. Kok siang jangen lah bo abih hari kok malom jangen lah bo abih minyak. Lai nen tokona di hati nen toilen di mato bona nak mongotongah ge mokosuik nak monyampei ge. Ko hadapen ibu dengan bapo. Apolah bisa bona go kami kotongah ge mokosuik go kami sampei ge ko hadapen ibu dengan bapo ken itu cako do  mamak. Jadi itulah kinin tu lah kami goligo bulek lah kami ompiang picak lah dapek kato sosuei kok lai mokosuik nak mongotongah ge lah bisa di sampaei ge. Sokitunyo Mamak.

 

e.    Tumbuken kato

-       Niniak mamak :

Ibu Bapo, bak kecek urang tuo-tuo dolu juo

Botanom padi ko tongah sawah

Poi baladang kotongah rimbo

kok bakato ndo sokali sudah

kok posen ndo sokali tibo

lai juo ke disampe ge ke ibu bapo le. Iyo kinin tu kok monconcang nak bolandasen kok molumpek nak bositumpu kok botopuak nak dua bolah tangen. Bak nyo urang  malu botanyo sosek di jalen, sogen bogalah hanyuik sorantou, manolah kinin tu Gunuang tenggi tumbuken kabuik kayu godang tumbuken angin lurah dalom luncuran batang tobiang boliku tumbuken aie manusia tumbuken kato. Itulah kinin tu nak bokato kami agak sopatah nak borundiang kami agak sobarih, kok kato do komano lah kami tumbuak ge kiro-kiro. Sokitunyo ibu bapo.

-       Sipangka

Olah sampe do mamak, iko mode cako juo logu nyo baru sobolum kato mamak kami jowob bopariah juo kami sobonta dolu. Monanti mama kami sokotiko. ( bawa kata bermufakat, setelah itu pulangkan kembali ).

-       Niniak Mamak (Pasa nen biaso)

-       Sipangka

Mamak, tolambek kami monjawek kato niniak mamak tadi bukan mukosuik di songajo tapi moncari kato nen sosuei, manolah titah niniak mamak cako tu kok monconcang nak bolandasen kok molumpek nak bositumpu kok botopuak nak dua bolah tangen. Kok malu botanyo sosek di jalen, sogen bogalah hanyuik sorantou manolah kinin tu gunuang tenggi tumbuken kabuik kayu godang tumbuke angin lurah dalom luncuran batang tobiang boliku tumbuken aie manusia tumbuken kato. Itulah kinin tu nak bokato kami agak sopatah nak borundiang kami agak sobarih, kok kato do komano lah kami tumbuak ge kiro-kiro, ken itu cako do mamak. Ndo ke bopanjang-panjang jowobnyo doh mamak. Mo kami barisen ibu bapo lai nen duduak soamparen lai nen togk sopomatang, kok pandang jauah layang ge lah kok pandang dokek tukiak ge. Itu nyo nen jowobnyo dari kami.

-       Niniak Mamak

Kalu mantunyo mo Alhamdulillah...

 

f.     Ba Tanyo Lansak ( Minto di bimbiang )

-       Niniak Mamak :

Ibu bapo, ko dari sotingkek ko sotingkek nampak nyo go mo lai  juo ke disampe ge ko ibu bapo le. Manolah lah nen ke di sampe do singkek nyo, tapi walaupun singkek nak dismpe ge juo mangkok jadi. Iyo  bak  popatah  cupak  di gantang  dek banyak ragu kok tibo dek lamo lupo kok datang Allah bosifet kodim manusia bo sifet kilof Agak kok ragu beko monitah nen tenggi kurang anjuang. Nen godang kurang ambah sobob dek sosak dengan simpik. Alua kateh kok ko bawah patuik di tongah kok kotopi indo totompuah di jalennyo, kok tuo mo tuo dek umunyo pongalamen kurang pondapek indo soborapo, ibaret momahek indo to pahek digarisnyo, ibaret monuga indo to boniah di lansaknyo,  Kok darah tu baru sotampuak pinang kok umua baru sotampuak jaguang kok elemu baru sokulik bawang. ateh namo niniak mamak tolobiah daulu kami minto moof ko ibu bapo yo nak minto di bimbiang kami ko jalen nen bona nak minto di tunjuak ge kami nen elok. Sokitu dolunyo rang tuo sumondo.

 

-       Sipangka :

Lah sampe do mamak, sopanjang titah nen mamak sampe ge iyo kok kateh lah to amba gadang ko bawah lah to kesiak bulen, tapi sungguah pun sorupo itu lomak siriah lega carano lomak lauak ko pomasak lomak kato ko mufoket. Monanti mamak dolu sokotiko. ( Lalu dibawa kata ke mufakat, setelah itu pulangkan kembali ). Mamak tolambek kami monjawek kecek mamak cako tapi bukan mokosuik di songajo hanyo moncari kato nen so iyo.  Manolah sotontang kato mamak cako tu. Iyo  bak  popatah  cupak  di gantang  dek banyak ragu kok tibo dek lamo lupo kok datang Allah bosifet kodim manusia bo sifet kilof Agak kok ragu beko monitah nen tenggi kurang anjuang. Nen godang kurang ambah sobob dek sosak dengan simpik. Alua kateh kok ko bawah patuik di tongah kok kotopi. Indo toboniah dilansaknyo indo totompuah di jalennyo, kok tuo mo tuo dek umunyo pongalamen kurang pondapek indo soborapo, ibaret momahek indo to pahek digarisnyo, ibaret monuga indo indok to boniah di lansaknyo,  Kok darah tu baru sotampuak pinang kok umua baru sotampuak jaguang kok elemu baru sokulik bawang. Kami ateh namo niniak mamak tolobiah daulu kami minto kami minto moof yo nakminto di bimbiang kami ko jalen nen bona nak minto di tunjuak ge kami nen elok. Iyo mantu cako do nmamak. Nen kami ateh namo sipangka lah kami atak etong ge. Mo samo – samo monjago kito beko. Baliak nyo kok tumbuah pulo dari kami minto pulo kami ke mamak nak di jago ge kami.

 

 IV.       ALUA PASAMBAHAN SIRIAH

-       Niniak Mamak

Mongecek kito baliak ibu bapo

Jam gadang di Bukittinggi

Kurai Taji di Pariaman

Sambuiklah salam dari kami

Kaganti kito bajawek tangan

Dari japun handak ko japun

Cino momuek pocak bolah

Ampun boribut kali ampun

Ampun kami kopado niniak dengan mamak

Nen godang di baso batuah

Solirik bondue ditopi, dua langgam bondua ditongah lalu monyasak ko kapa serek, sajak dari ujung sampai ko pangka, lalu sampe ko halamen rila dengan maaf nen kami pintak dalam buah posombahen

Hondak ko gunuang sikalibuik

Poi moncari sikayu jati

Gagok gonta lah kami monyobuik

Pongolu banyak nen sati

Ontah sapek ontah polito

Dibao urang di koto tuo

Ontah dapek ontah tido

Maklumlah elemu olun soborapo

Tombilang di baliak lansek

Tokolom dek buah rambei

Dibilang sado nen dapek

Nen tingga tambah di nen pandei

 

(boleh dipakai kata penghormatan)

Hormat Niniak Mamak

Kopado niniak mamak nen godang dibaso botuah dalom parik nen bolingka soroto di aua nen bobarih. Urang nen arif nen bijaksano nen tau dek kilek dengan bayang soroto alamaik kato sampai. Ibaret kayu godang ditongah padang urek nyo tompek boselo batang nen godang tompek bosanda daun nen rimbun tompek bolinduang, bolinduang dari paneh botoduah dari ujen. Kok poi tompek botanyo kok pulang tompek boborito.

Hormat Cadiak Pandai

Kopado cadiak pandai nen tau dek runciang ko moncucuak soroto anak nen monyangkuik tau dek angin nen bosuruik soroto ombak nen bosabuang tau dek kilek dengan bayang soroto raso dengan poreso.

 

 

 

Hormat Alim Ulama

Kopado alim ulama suluah bendang dalom nogori polito nen torang dalom kampuang nen tau di haram jo nen halal nen tau di sah dengan nen batal tau dek syariat dengan hakikat tompek bontanyo lahie batin nen tau dek hadis jo dalil.

Hormat Anak Nogori

Kopado anak nogori nen mudo pombimbiang dunia nen copek tangen nen ringen kaki. Kok copek tangen indo pomocah nen ringen kaki indo ponaruang nen bohati suci bomuko jeniah ayom tangkeh dalom golanggang ancang-ancang dalom nogori.

Hormat bundo Kanduang

Kopado bundo kanduang limpopeh rumah nen godang umbun puruak pegangen kunci sumarak kampuang jo halaman sumarak koto jo nogori kok litak tompek mominto nasi kok auih tompek mominto aie kopayuang panji dalom sorugo.

 

PASAMBAHAN SIRIAH NINIAK MAMAK

-       Niniak Mamak

Limbak nen dari pado itu iyo bak popatah dek urang tuo-tuo yo talatak puntiang dihulu dibawah kumpalan taji asa mulo kato dahulu. Tigo limbago nen tojalin nen portamo sombah monyombah kodua baso ngen basi ketigo siriah dengan pinang. Sombah monyombah dalom adet tali botali undang-undang tosobuik bomuluik manih tomasuak baso dengan basi soroto hereang dengan gendeang. Muluik manih tolempong kato, baso baiak gulo dibibie, budi elok tali pikatan di dalam cupak rang piawai dalam gantang panghidupen bonamolah adet sopan dengan santun, itulah carano urang namokan kiasan didalam adet Minang Kabau itulah ajaren adet bosandi syarak syarak bosandi kitabullah.

Buruang sinurak jo buruang nuri

Siculiak ateh pomatang

Siriah golak pinang monari

Moliek olek nen lah datang

Ramo-ramo tebang molayang

Molayang ko koto tongah

Banyak nyo ompek puluah ompek.

Indah carano bukan kopalang

Tolotak di tongah-tongah

Di tongah urang nen rapek.

Itulah carano pulang poi dari pokok ko panggilan dari pangka lalu ko ujuang tolayok ko ruang tongah tolayang ko ruang topi tounjuak ko muko datuak tibo dimuko kito bosamo. Carano banamo carano basa datang nan dari tanah banja buaten tukang si reno ali buaten anak sungai puah. Indah carano bukan ko palang baukie bo mego mego botata dengan pucuak robuang botutuik dengan kain suto, suto nen datang dari mokah bontuak nyo bokilek bolilauan bak maniak di timpo paneh bak cemin di timpo bulen. Manolah kinintu tontang corano nen lah lotongah jikok diliek alang kopado isinyo iyo ponuah borisi kolangkapen limo bak bilangen jari itulah ajaren adet bosandi sarak sarak bosandi kitabullah. Apolah isi kolangkapen nen portamo siriah nen kodua pinang nen kotigo sodah nen koompek gambie nen kolimo timbakau.

Lorong kopado siriahnyo, siriah timbalom kuku balom, siriah udang tampak ari, siriah nen kuniang-kuniang gagang di tanom di lamen rumah bojunjuang dengan aua kuniang bokisa ko suduik rumah bojunjuang dengan kulik manih, kobolek condong gagangnyo tiok naik tiok di gotie usah ke habis botambah lobek, diambiak buahnyo untuk tinamen diambiak daunnyo untuak kusuak mandi usah ke ratak ritiah tido usah ke layua botambah hiduik  tiok pasa di tompuahnyo makanen anak rajo rajo makanen anak sutan sutan pamenan niniak dengan mamak elok ponanti elek nen tibo.

Dipiliah - piliah anak lado

Sotiok dipiliah layue juo

Mangko siriah dalom carano

kiasen tokanduang didalomnyo.

Nen tuo di hormati nen kociak disayangi samo godang bao bokawen kok tuo elok bahaso kok godang jangen monindiah itulah budi nen elok. Bak popatah dek urang tuo tuo dolu kok bojalen di nen data kok mongakok dinen mesiak ko

Kok mobolaku di nen bona kok bokato di nen baiak.

Lorong kopado pinangnyo. Pinang bo tatak jo bantuntun, bak bawang dibolah dua bak dasun di bolah ompek, pinang bonamo pinang lolan tengginyo jangkou-jangkouen dijuluak dengan galah, galah ndok sampe di awei dengan tangen, tangen to lampau ko langik cewang pucuaknyo kobumi toguah urek sotaun pojalanen tupei momanjeknyo rancak ponanti olek nen tibo.

Urang padang bokudo limo

Hondak kopoken hari lah sonjo

Mangko pinang dalom carano

posen tosimpen didalomnyo.

Salamo hiduik didunia ko Kok ringen samo dijinjiang kok borek samo dipikue sociok umpamo ayom sodonciang umpamo bosi sokato muluik dengan hati sosuai lahie dengan batin.

Lorong kopado sodahnyo langkitang godang asa mulonyo tomasuak pulo kulik pensi dibasuah dengan aie ombun borameh dengan pati santen di giliang di tapak tangen di ombuih dengan lingka cino dikipeh jo ambai-ambai putiah bak bontuak bonak balom dipalik jo jari tongah pindah ko jari manih mombayang ko tapak tangen usah ken usak botambah ponuah itulah kato bokiasen.

Lah basah mangkok toraso

Lah dingin mongigie pulo

Mangko sodah dalom carano

Pituah tosimpen didalomnyo.

Tonamo urang minang kabau monyombah tuhen nen maha kuaso sumbayang limo wokotu itulah ajaren adet bosandi syarak, syarak bosandi kitobulloh syarak nen mongato adet nen momakei bak popatah urang minang

si malin poi ka parak

ka parak mambao ladiang

lukolah pao ko duanyo,

kalo adet dengan syarak

ibaret aua dengan tobiang

sanda monyanda koduonyo

Lorong kopado gambienyo koba borito nen kami donga buaten puti sari lomak sopipie jatuah kosiriah mombayang lansuang ko muko sirah tingga dibibie kolek langsuang ko rongkungen sehetlah anggota tubuah ko sadonyo. elok ponanti olek nen tibo

Urang pasisie baanak daro

Poi borolek ko kiliren jao

Mangko gambie dalom carano

Pangajaran tosimpen didalamnyo.

Duduak surang bosimpik-simpik duduak bosamo bo lapang-lapang. kato surang dibuleki kato basamo dipaiyoge bulek aie ko pombuluah bulek kato komufoket, kok bulek indo bosanding kok picak indo bosogi, kok bulek lah bisa digolek ge kok picak lah bisa si layangkan lah data bak lantei simin lah licin bak dindiang cemin.

Lorong kopado timbakaunyo, haluih saik nyo dek moracik soheto panjang jalua nyo indo ko mesiak nen dek paneh mesiak dek ombun tongah malom dibaka diujuang jari sotaun pojalanen horum baun nyo itulah kato bokiasen.

Sikabau rancak panteinyo

Rami dek anak mudo-mudo

Mangko timbakau dalom carano

Amanet tokanduang di dalomnyo

Hiduik diminang kabau jauah kito jalang bo jalang dokek kito cinto bocinto kok rusuah iyo dibujuak tagamang yo jawek kok anyuik dipintesi kok tarapuang di kaik kok condong iyo di tungkek lomah makanen tueh nen panjang makanen korek kok singkek iyo di makanen uleh. Nen lai samo dimaken kok indo samo dicari kok dapek samo bolabo kok ilang samo borugi. Itulah kinin tu nak sampei niet dengan mukosuik ujuik pohom nak nyo joleh sodang kotiko bungo kombang. Siriah solei nak dicabiak pinang sobuah nen kedigotok sodah socupu nen ke dipalik gambie sodaun nen ke dipipie rokok sobatang nen ke diisok. Itulah Siriah sokapua urang namoge.

tanom sirah tanomlah pinang

tanom karakok dihalaman

cabiak siriah gatoklah pinang

bakalah rokok pomenen tangan.

Itulah  isi sombah kami, sombah datang solom pun tibo kato nen bona nen kami sampei ge.

bolayei kapa kotanjuang perak

mancari kayu ukiran cino

bopasie loweh ditopi pantei

Rila dengan moof nen kami pintak

kopado urang tuo sumondo

sombah dibaleh di nen pandei

Ambiak payuang daun pisang

pisang sodang bobuah bo sikek-sikek

cari korisiak jelo-bojelo.

Indo elok rontang di popanjang

elok dikumpa nak nyo singkek

ambiak sokiro nen poguno.      (Sokitu sombah ko ibubapo)

                          

 

 

Posombahen siriah dari sipangka

( Setelah bermufakat )

Tolambek kami monjawek kato mamak buken mokosuik di songajo hanyo moncari kato nen so iyo. manolah sombah Mamak cako (dibaco sombah siriah tadi) ke mode cako do iyolah kami goligo bulek lah kami ompiang picak manolah jowobnyo singkeknyo mamak, bak nyo popatah juo dek urang tuo-tuo kito dolu, mulia adet iyo karano janji mulia pusoko iyo dek perbuaten lah ditariak komufoket lah dielo dengen rundingen nen dari kami kok masak siriah do tigo parakaro, nen partamo masak digagang, kaduo masak dimakan, katigo masak jo mupoket, nen dikatokan masak digagang rononya kuniang mangarisiak, tampuak layua daunlah kucuik, dek ulek indo ko tomaken, dek somuik indo ko tojalai nyampang jatuah menjalang tanah, jangen boniet kodijunjuang lai, tampan kajadi sorak sajo, dalia nansakah siriah masak, tosobuik masak dimaken sodang tangkei lai bogotah, maso daun lai bominyak, gilo dikijo pinang mudo, dirayu sadah nen jo gambia, bararak lalu kacarano diupam manjadi satu, dikunyah sirah bibia, koleknyo ditingga dirakuangan, sarinyo naiak kaparoman, Kok dikatokan masak jo mupakaik olun diliek lah tapandang, lah joleh bangun rauiknyo.olun dikicok lah taraso, la nyato lomak manihnyo, masak kok siriah do umpamo lah kami cabiak kok pinang umpamo lah kami gotok lah sirah niniak mamak do sirahnyo tingga di bibie kolek tibo di ronkungen itu sungguah nen kami anta ge ke niniak mamak, lai tolingka dalaom adet.

-       Niniak Mamak

Tontang nen dek itu lah monuruik pasa nen biaso tu nyo ibubapo.

-       Sipangka

Kinin tu ontah dek copek tangen mongapue ontah dek copek goromen mongunyah kinin lah tingga kolek dirongkungen sori lah naiak ko bumbun-bumbun. Iyo lah sirah siriah Ninik mamak

 

III. ALUA MOKUSUIK NEN KE DI BUEK

DATUAK MAHA RAJO DIRAJO

Takalo langik tasentak naiak takalo bumi ta hantam turun nabi adam nabi partamo nabi nuh rasul koduo, tajadi di tanah kuniang to hontak ko tiang arasy to heda ko ateh kurisi, kurisi bonamo indo jati batabua intan dengan podi bo ukie bomego mego bo aleh jo kain suto, suto banamo ainul banad tanunan anak bidadari, dalom sorugo tujuah pangkek, kurisi kadudukan nan dipertuan sultan Zulkarnain anak Zais Alaihissalam anak adam nan kurang aso ompek puluah. Mangko borombuihlah angin sidolak dolai, bobunyi rabat jo kucapi soroto gondang jo sorunei bo buni pulo sagalo buni-bunian dalom sorugo tando alamaik bagadang hati tatagak payuang jo umbua-umbua kawin jo anak Rajo Ruhum.

Allahuta’ala kayo sungguah urang bobuek sokondak hatinyo, kok kondak iyo sodang bolaku pintak sodang ko buliah dapeklah anak tigo urang laki-laki, nen portamo maharajo alif nen koduo  maha rajo depang nen kotigo maha rajo-dirajo, maha rajo Alif turun ko banuo Ruhum maha rajo Depang turun ko banuo cino maha rajo dirajo turun ko pulau omeh kito nangko. Pihak kopado niniak kito maha rajo di rajo toragak dihati nak bolahie  diambiaklah sompen sobuah tobuek dari kayu jati mangko bolayielah niniak kito maso itu mombao onom boleh urang laki- laki jo podusi soroto cadiak bilang urang nen arif nan bijaksano jo datuak suri di rajo. Indok sajo niniak kito mombao urang nen banyak tadi tu do boliau mombao pulo puti indo jati dari tanah basa. Lalu iniak kito mambao harimau campo kambiang hutan anjiang mualaf sarato kuciang siam, nan dibao dek niniak kito tu bukanlah samato-mato binatang tapi manusia juo dek tingkah jo parangainyo mangko dipanggie sarupo itu. Mangko balahie lah niniak kito dimaso itu maharuangi lawuik amarullah mambao urang nan banyak tadi, habih hari baganti hari habih minggu baganti minggu mangko tadampar lah niniak kito sarato urang nan banyak tadi diateh batu karang nen godang maso itu kini ko namonyo gunuang serang. Sahinggo pacahlah sampan nantun tak bisa di paguno lai, mangko manitahlah niniak kito kopado urang nen banyak tadi supayo sampan bisak dipelok i sarupo sadio kalo. Mangko urang nen banyak tu di baolah kato ba iyo mangko dapeklah tukang limo urang, tukang buken tukang sumbarang tukang, tukang nen pandei monarah monilontang, nen pandei momahek dalom aie pandei mo agak moagiah pandei mo ukua jo monjankou. Dek rajin tukang bokorejo mangko sudah lah sampan nantun baliak sarupo sodio kalo, mangko balayie lah baliak niniak kito mombao urang nen banyak cako. Habih pulo hari boganti hari habih pulo minggu bo ganti minggu mangko nampak api to kijok-kijok jauh di ujuang lauik mangko monitahlah niniak kito kopado cati bilang pandai, dek cati bilang pandai urang nen arif dan bijaksano mangko ditujukanlah sampan kaarah api tu, awak tibo api padam mangko gelap gulitalah maso itu, sahinggo tadampalah niniak kito diatek puncak puri gunuang kinin banamo Gunuang Barapi. Mangko lokek popatah dek urang tuo-tuo dahulu,

Dimano Asa Palito

Dibaliak Telong Nan Batali

Dimano Asa Niniak Kito

Dipuncak Gunuang Barapi.

Pisau sirauik dahulunyo, diasah mangko bamato, lautan sajo partamonyo, kini manjadi alam pulau paco. Dek maso bajalan juo aie batambah susuik juo daratan batambah leba juo, mangko pandang jauah dilayangkan pandang dakek ditukiakan, bapikie lah niniak kito dimaso itu, kok pikie palito hati nanang saribu aka, mangko gajua suruik baliak palangkahan ka sitapo nan hitam batang ka sitapu nen loweh daun ko sungai aie nen badarun sungai nen indo sati amek tapi sado nen lalu mati juo. Lah sampei dipinggang gunuang barapi, dakek batu hampa putiah dibawah lagundi nan baselo dibawah bukik patah patigo itulah bukik patah sambilan bukik nan tidak dapek angin lurah nen tido dapek aie sinan sirangkak nen badangkang sinen buayo nen putiah daguak sinenlah hantu nen borayun. Dek maso bojalen juo aie botambah susuik juo daratan botambah leba juo mangko mulai niniak kito sarato urang nen banyak tadi moncancang ngen molateh monarah ngen manaruko mambuek dusun ngen  taratak sobolun koto dengen nogari, dibuek rumah dengan tanggo di buek sawah dengan ladang, sawah loweh sotampang boniah makanen urang tigo luak, itulah padi nen kombang sampei ko kito sokarang kinin. Dek maso bojalen juo anak komonaken botambah kombang mangko disinan niniak kito mombuek adet mangarang undang. Dibuek adet nen ompek rupo, Portamo Barih bobaleh ko Duo Ukuo Bo Jangko ko Tigo suri touladen ko Ompek cupak jo gantang. Di buek pulo undang nen ompek, Portamo Nogori dibori bo pongulu ko Duo Rantau bo rajo-rajo, ko tigo warih jawek bo jawek ko Ompek Pusoko Turun to murun sampai sokarang kinin iyo di alam Minang Kabau. Sampei pulo lah ko nogori kito nogari ponghulu nen limo boleh.

                                                

 

 

ANGIN BO PUHUN ( untuk niniak mamak dan ibu bapo)

Tak kalo rumpuik kadilayue, tak kalo lareh ka diconcang, tak kalo latah kadikuyie tak kalo parik kodilingka tak kalo aua ka dibarih, kok angin nen bopuhun kok ujen nen bo pangka kok kato yo boasa, kok kitob bokosalinen adek bokoturunen dari niniak turun ko mamak dari mamak turun ko komonaken sampei ko kito sokarang kinin. Kok pulei botingkek naik moningga ke rueh dengan buku kok manusia botingkek turun moningga ge adet dengan pusoko soreto cucu dengan komonaken. Manolah kinin tu adet lamo pusoko usang, usang-usang kito pobaru lapuak-lapuak kito kajangi rimbun-rimbun kito tutuah sampei ko kito sokarang kinin. Yo lah adet pongulu nen sopuluah soboleh disungei lompang ompek dimudiak simpang cukuiklah pongulu nen limo boleh samo bo ulu nen ko gunuang samo bo muaro nen ko lauik  samo bobapak nen ko rajo samo bomande nen ko puti, kotungkek yo ko gunuang ko apuang-apung yo ko lauik, adet nen samo dari parik batu. Dalom  pongulu nen sopuluah samo rindiah dek pakaien samo sorek dek pusoko kok di uji lai samo kuniang kok timbang lai samo borek kok diukua lai samo panjang kok dibideh lai samo loweh kok mondapek samo bolabo kok ilang samo borugi sociok nen bak ayom sodonciang nen bak bosi. manolah kinin tu adet lamo pusoko usang nen didirikan dek urang tuo-tuo kito dolu nen boturiah botuladen bososok bojorami nen botunggue pombalasen itulah nen kito korejo ge sampei sokarang kinin. Tumbuah barang nen tumbuah bia baiak ataupun buruak bia tuah ataupun cilako dalom parik kito masiang-masiang mangko jauah kito bojuputen dokek kito bo imbauen niniak dengan mamak ibu dengan bapo cucu dengan komonaken. Lah duduak kito dirumah nen sobuah, lah duduak kito soamparen, lah togak kito sopomatang, lah di etong baiak dengan buruak soroto tuah dengan cilako manolah kinin tumbuah dalom ( nama parik kita dengan parik yang bersankutan ) kok malang indo dapek kito tulak do kok mujua indo dapek kito raiah iyo kinin tu ( malang to tulak  ko “bolakang/ko hadapen” atau mujua to tulak kobolakang/ko hadapen )

 

 

 

 

MONDUDUAK URANG

-       Niniak Mamak

(Ibu Bapo)

Manolah asa mulo kato iyo dari ibu dengan bapo, kok dikiro maso nen daulu kotiko mande nak molahie ge, ibaret bo layie di lawuik lopeh monuju ko sobuah pulo nen di ompeh dek ulah badei diombang ambiang golombang. Di bakalah kumayen putiah asok mondulang ko udaro dipasanglah niet dengan kaua kopado tuhen nen maha kuaso untuang untuang dapek lah anak laki-laki atau anak si perempuan. Dek kondak sodang bolaku dek pintak sodang kobuliah rupo-ruponyo.

(kalau anak laki-laki)

totopek lah anak nen laki-laki nen kociak lah digodang ge. Somaso kociak dibao mandi di asuah dibao pulang, aie soroguik lah diminum ge nasi sosuok lah di maken ge, inggok langau di alou-alou hinggok nyamuak di tampa-tampa, kok monangih lah di ayun ge kok tidua lah di solimuti, lah kociak kini lah godang, lah godang di aja pandei, lah pandei di aja tahu, tau di ereang dengan gendeang, tau diranggeh nen komalantiang tau di dahen ko moimpok tau dek rantiang ko mancucuak, disorah ge pulo lah bodagang jo boniago nak tau untuang jo rugi nak tau tomaken atau bolabo disorah ge ko surou mongaji soroto surek dengan lihanyo buliah  nak tau porintah ngen larangen buliah nak tau di halal dengen haram soroto sah dengen nen bata. abih hari boganti minggu habih minggu boganti bulan habih bulen boganti tahun kok godang nyo raso di ombuih-ombuih kok tenggi nyo raso dibubuik, kok dipandang anak iyolah godang, lah patuik pulo pulang ko rumahnyo..

(kalau anak perempuan)

totopek anak nen porompuen nen kociak lah di godang ge somaso kociak nyo di bao mandi diasuah dibao pulang, aie soroguik lah diminum ge nasi sosuok lah di maken ge, inggok langau di alou-alou hinggok nyamuak di tampa-tampa, kok monangih lah di ayun ge kok tidua lah di solimuti lah kociak kini lah godang, lah godang di aja pandei, pandei mo atak dengan mo etong, pandei maagak dengan mo agiah, pandei mo ukua dengan mojangkau, pohuni rumah nen godang sumarak kampuang jo halaman kok hauih tompek minto aie kok litak tompek minto nasi ko tuduang panji dalom sorugo. kok godang nyo raso di ombuih-ombuih kok tengginyo raso di bubuik. kok dipandang anak iyolah godang, ibaret kacang lah patuik plo bo junjungen.

Manolah kinin tu (bungo dek awak kumbang dek urang) ibaret aka bojunteien tompek bogayuik anak siamang. Lailah ruponyo gorah-gorah jadi tokarang kecek di aie di bao pulang. Itulah agak kedi kecek ge ko mamak ati nen gonta-gonta takuik indo di kecek ge ati moraso- raso juo, bak popatah tuo-tuo kito dolu,

rang tinggom mombolah roten

roten di bolah monjadi duo

siang monjadi angen-angen

malom monjadi kiro-kiro

Rupo-ruponyo dek ibu dengan bapo lah bao duduak lah di inok monuangkan dapeklah mangko pikiren sokotiko ditanak lah nasi nen sotekong dimakenlah abih-abih dibaok tidue monolungkuik di etonglah bilah-bilah lantei, dibao tidue monolontang dibilang-bilang tulang atok. Iyo dek tuhen bosifet kayo Allahuta’ala nen monggorak ge juo bosipiciang mo ombuh losuang bo situnggam si rauik maken bialah lidah ko to guntiang bialah lihie ko to ko topancuang kalo nen bona tu kedisampei juo te nyo, nen punyo anak sungguahlah awak tapi bonang putiahnyo mamak nen punyo, mangko dicarilah mamak dunsanak ondek, niniak dunsanak anduang dalom rumah nen sobuah.

(niniak mamak dalom rumah nen sobuah)

rupo-ruponyo niniak dengan mamak dalom rumah nen sobuah moningadahlah ko langik nampak limo parakaro, nen portamo awan hijau nen kodua kabuik putiah nen ko tigo bintang nen koompek bulen nen kolimo matohari, monakua pulo mamak ko bumi nampak pulo limo parakaro nen portamo rumpuik rantai nen koduo sawah dengen bonda nen kotigo kampuang jo halamen nen koompek rumah nen godang nen kolimo cucu jo komonaken, kok dipandang cucu jo komonaken iyolah godang, kok godang lah monanti patuik, kok (laki laki-laki lah patuik pulang korumahnyo/podusi ibaret kacang lah patuik pulo bojunjungen) dialuren niniak jo mamak dek urang nen arif bijaksano tau di ereang dengan gendeang tau dinilai dengan patuik, yo disorah ge lah ko ibu dengan bapo untuak moncari aka nen bojumbei moncari kato nen bo ujuang.

(ibu bapo)

rupo-ruponyo ibu dengan bapo dicarilah aka dengan bodi dapek rueh lai botomu dengan buku dapek kato nen boujuang tampek moikek janji jo karang, dicoritokan kopado niniak dengan mamak.

(niniak mamak dalom rumah nen sobuah)

dek niniak dengan mamak lah di atak etong dalam rumah nen sobuah, lah di goligo bulek lah diompiang picak kok bulek lah buliah di golek kan kok picak lah bisa dilayangkan dek tokok bojorong tonum boguluang iyo disorah ge ko ibu dengan bapo tontang tando.

(ibu bapo)

dek ibu dengan bapo dikakok lah korejo tontang tando lah dibuek janji nen orek padan nen toguah antaro ibu dengan bapo baliak bo timba kok ibaret kayu lah di kobek dengan aka kok manusia lah diikek dengan tando yo lah botando anak ibu bapo cucu komonaken datuak (majo lelo dengan ngen cucu komonaken datuak mangkudun), monuruik caro adat, tingga lah kini sacaro syaraknyo.

(niniak mamak dalom rumah nen sobuah)

dek mamak dalom rumah nen sobuah lah dituruik jalan lah di tompuah baka  rasonyo indo ko tomaken abih indo ko to minum surang, ditingkek lah jonjang nen portamo dicarilah mamak nen soporompek

(niniak mamak soporompek)

dek mamak nen soporompek nen bo ati loweh nen bodado lapang, rasonyo indo giang ko momutuih mangko ditingkek jonjang nen koduo, di cari mamak korono soko .

(niniak mamak korono soko)

Mangko dek mamak korono soko tido bomimpi mombuek puro tido bomimpi padi mombuek lumbuang lai lah kironyo bo lawuik loweh  bopadang lapang di agiah izin dimaso itu, di bueklah hitam di ateh putiah ibaret dowet dia teh koroteh, dek tokok bojorong tonum boguluang iyo di sorah ge kopado urang nen tau dek syarak yaitu imam dengan kotik soroto dengan bilal.

(socaro syarak)

dek imam dengen kotik soroto bilal iyolah urang nen tau dek syarak di dalam nogori dibaolah anak ibubapo cucu komonaken dek niniak dengan mamak kopado wali hakim, dek wali hakim di kakoklah korejonyo dibacolah kutubah akad nikah lah bojowob ijab dengan kabul, mangko lah nikah lah anak ibu bapo cucu komonaken dek niniak dengan mamak (suku soko Dt. Majo Lelo dengan cucu komonaken niniak mamak suku soko Dt.Mangkudun). Jadi itulah kinin mangko jauh kito bojupen dokek kito bo imbowen  niniak dengan mamak ibu dengan bapo soroto cucu dengan komonaken, itu lah kinin ateh namo urang tuo ompek suku kohadapen urang tuo sumondo, nak mombori tau mombori pandei nen olun tau nak di bori tau nen olun pandei nak dibori pandei nak di kombang loweh nak di rontang panjang bak raso anak ibubapo cucu komonaken niniak dengan mamak lah nikah, sokitunyo ibu bapo.

 

-       Ibubapo/Sipangka

Mangko lah mamak sobolum kato di jowob sobolum gondang ditingkah anataro kami lai bo duo botigo minta pariah kami sobonta dolu.

(setelah bo pariah)

Tolambek juo kami monjowob kato mamak buken mokosuik di songajo hanyo moncari kato nen soiyo kinilah buleh aie kopomuluah lah bulek kato ko mufoket aku juo komonjowobnyo nyoh manolah tadi titah niniak mamak  (dibaca titah mamak tadi) ken mantu cako do rang tuo ompek suku, tontang dek itu do jowobnyo nyo kami hanyo singkeknyo, iyo lah tau kami lah pandei, nen olun tau kami bori tau nen olun pandei kami bori pandei kami rontang panjang kami kombang loweh, bak raso anak ibu bapo cucu komanaken (suku soko Dt. Majo Lelo dengan cucu komonaken niniak mamak suku soko Dt.Mangkudun) lah nikah hanyo sokitu nyo Niniak Mamak.

 

 

 

 

 

 

 

 

MO LIMAU DATUAK

Mamak korono dimuliakan dalom tigo bulen portamo bulen puaso kodua bulen ari rayo ko tiga bulen adiak ari rayo. Ilang mamak kito cari iduik mamak kito turuik. Manolah kinin tu kami dari cucu komonaken Dt. Majo lelo lah panjang lihie dek mondongak lah basa tolingo dek mondonga lah putiah mato dek momandang indo lai nampak mamak pulang ko parik nen bolingka ko aua nen bobarih ko dalom suku soko Dt. Majo Lelo. Malang indo dapek kito di tulak ko mujua indo dapek kito di raiah, malang iyo to tulak kobolakang kok mujua iyo toraiah ko muko, manolah kinin tu buken nyo mamak tingga diladang pombajaren urang hanyo tingga di korong kampuang urang iyo di dalom suku soko ( sebut kan nama Datuaknya ). Itulah kinin ateh kami di dalom parik nen bolingka di bawah aua nen bobarih dalom suku soko dt. Majo Lelo. Mangko jauan kami bojoputen dokek kami bo imbauan, nen jauah iyolah tibo nen dokek iyolah datang ko dalom parik nen bolingka kodalom aua nen bobarih ko dalom suku soko Dt. Majo lelo. Mangko kami duduak kodalom rumah nen godang, duduak induak pombarisan rang tuo ko ompek suku ibu dengan bapo soroto anak nogori, lah kami goligo bulek lah kami ompiang picak, bulek lah sogolek picak lah solayang kok bulek lah bisa di golek ge kok picak lah bisa di layang kan.iyo akan monjopuik datuak kami ko dalom parik nen bolingka ko dalom aua nen bobarih suku soko Datuak ( Sebut nama Datuak tempat mamak Beristri )  Iyo akan molimoui. Kami tompuah lobuah nen panjang lobuah luruih bak dibonang lobuah singkek siku bosiku jojak bajak monuriah lobuah pudiang omeh botimba jalen pudiang geni bo batang-batang aua cino bo rumpun-rumpun lah bajak jawi mo rusuak lobuah bo suluah matoari bo go langgang mato rang banyak nen tingga iyo bo sarang jauah nen di hadang hampie ke dokek nen dokek kinilah tibo kodalom parik nen bolingka aua nen bo barih ko dalom suku soko ( sebut nama datuak nen di hadang ), kami tompuah lamen posumandennyo lah kami topuak bondue nen molintang lah kami tingkek jonjang nen boanak lah duduak kami lantei nen bo bilah lah bosanda kami dindiang nen bobisik soroto disungkuik atok nen bo bangkauwen. Lah duduak kito so amparen lah togak kito sopamatang lah tebang kami sopulun lah inggok kami sodahen kok inggok kami monikom tua lah tebang kami dari suku soko Dt. Majolelo hinggok kami ko suku soko ( sebut nama datuk yang di hadang ). Iyo nak monjopuik mamak korono soko kami kadalom parik nen bolingka kodalom aua nen bo barih kodalom suku soko Dt. Majolelo mokosuik nak molimoi. Sokitunyo ompek suku.

 

MONJOPUIK DATUAK

Mamak korono dimuliakan dalom tigo bulen portamo bulen puaso kodua bulen ari rayo ko tiga bulen adiak ari rayo. Ilang mamak kito cari iduik mamak kito turuik. Manolah kinin tu kami dari cucu komonaken Dt. Majo lelo lah panjng lihie dek mondongak lah basa tolingo dek mondonga lah putiah mato dek momandang indo lai nampak mamak pulang ko parik nen bolingka ko aua nen bobarih ko dalom suku soko Dt. Majo Lelo. Malang indo dapek kito di tulak ko mujua indo dapek kito di raiah, malang iyo to tulak kobolakang kok mujua iyo toraiah ko muko, manolah kinin tu buken nyo mamak tingga diladang pombajaren urang hanyo tingga di korong kampuang urang iyo di dalom suku soko ( sebut kan nama Datuaknya ). Itulah kinin ateh kami di dalom parik nen bolingka di bawah aua nen bobarih dalom suku soko dt. Majo Lelo. Mangko jauan kami bojoputen dokek kami bo imbauan, nen jauah iyolah tibo nen dokek iyolah datang ko dalom parik nen bolingka kodalom aua nen bobarih ko dalom suku soko Dt. Majo lelo. Mangko kami duduak kodalom rumah nen godang, duduak induak pombarisan rang tuo ko ompek suku ibu dengan bapo soroto anak nogori, lah kami goligo bulek lah kami ompiang picak, bulek lah sogolek picak lah solayang kok bulek lah bisa di golek ge kok picak lah bisa di layang kan.iyo akan monjopuik datuak kami ko dalom prarik nen bolingka ko dalom aua nen bobarih suku soko Datuak ( Sebut nama Datuak tempat mamak Beristri )  Iyo akan monjopuik Mamak kami ko dalom suku soko Dt. Majolelo. Kami tompuah lobuah nen panjang lobuah luruih bak dibonang lobuah singkek siku bosiku jojak bajak monuriah lobuah pudiang omeh botimba jalen pudiang geni bo batng-batang aua cino bo rumpun-rumpun lah bajak jawi mo rusuak lobuah bo suluah matoari bo go langgang mato rang banyak nen tingga iyo bo sarang jauah nen di hadang hampie ke dokek nen dokek kinilah tibo kodalom parik nen bolingka aua nen bo barih ko dalom suku soko ( sebut nama datuak nen di hadang ), kami tompuah lamen posumandennyo lah kami topuak bondue nen molintang lah kami tingkek jonjang nen boanak lah duduak kami lantei nen bo bilah lah bosanda kami dindiang nen bobisik soroto disungkuik atok nen bo bangkauwen. Lah duduak kito so ampaern lah togak kito sopamatang lah tebang kami sopulun lah inggok kami sodahen kok inggok kami monikom tua lah tebang kami dari suku soko Dt. Majolelo hinggok kami ko suku soko ( sebut nama datuk yang di hadang ). Ioy nak monjopuik mamak korono soko kami kadalom parik nen bolingka kodalom aua nen bo barih kodalom suku soko Dr. Majolelo mokosuik nak monjopuik mamak kami kodalom suku soko Dt. Majolelo. Sokitunyo ompek suku.

 

JOPUIK BORADET

Itulah kinin ateh kami di dalom parik nen bolingka di bawah aua nen bobarih dalom suku soko dt. Majo Lelo. Mangko jauan kami bojoputen dokek kami bo imbauan, nen jauah iyolah tibo nen dokek iyolah datang ko dalom parik nen bolingka kodalom aua nen bobarih ko dalom suku soko Dt. Majo lelo. Mangko kami duduak kodalom rumah nen godang, duduak induak pombarisan rang tuo ko ompek suku ibu dengan bapo soroto anak nogori, lah kami goligo bulek lah kami ompiang picak, bulek lah sogolek picak lah solayang kok bulek lah bisa di golek ge kok picak lah bisa di layang kan.iyo akan monjopuik datuak kami ko dalom prarik nen bolingka ko dalom aua nen bobarih suku soko Datuak ( Sebut nama Datuak tempat mamak Beristri )  monjuik adet cucu komanaken dari Dt. Majolelo. Turun lai kami ko halamen kami tompuah lobuah nen panjang lobuah luruih bak dibonang lobuah singkek siku bosiku jojak bajak monuriah lobuah pudiang omeh botimba jalen pudiang geni bo batng-batang aua cino bo rumpun-rumpun lah bajak jawi mo rusuak lobuah bo suluah matoari bo go langgang mato rang banyak nen tingga iyo bo sarang jauah nen di hadang hampie ke dokek nen dokek kinilah tibo kodalom parik nen bolingka aua nen bo barih ko dalom suku soko ( sebut nama datuak nen di hadang ), kami tompuah lamen posumandennyo lah kami topuak bondue nen molintang lah kami tingkek jonjang nen boanak lah duduak kami lantei nen bo bilah lah bosanda kami dindiang nen bobisik soroto disungkuik atok nen bo bangkauwen. Lah duduak kito so ampaern lah togak kito sopamatang lah tebang kami sopulun lah inggok kami sodahen kok inggok kami monikom tua lah tebang kami dari suku soko Dt. Majolelo hinggok kami ko suku soko ( sebut nama datuk yang di hadang ). Dolu kok datang iyo bo nampak muko kinin kok pulang nak bonampak pungguang. Iyo nak monjopuik adet cucu komonaken kodalom parik nen bolingka kodalom aua nen bo barih kodalom suku soko Dt. Majolelo kok pintak nak pobuliah ge kok kondak nak dipolaku ge. Sokitunyo ompek suku.

 

 

 

 

MONJOPUIK MOYIK

Itulah kinin ateh kami di dalom parik nen bolingka di bawah aua nen bobarih dalom suku soko dt. Majo Lelo. Mangko jauan kami bojoputen dokek kami bo imbauan, nen jauah iyolah tibo nen dokek iyolah datang ko dalom parik nen bolingka kodalom aua nen bobarih ko dalom suku soko Dt. Majo lelo. Mangko kami duduak kodalom rumah nen godang, duduak induak pombarisan rang tuo ko ompek suku ibu dengan bapo soroto anak nogori, lah kami goligo bulek lah kami ompiang picak, bulek lah sogolek picak lah solayang kok bulek lah bisa di golek ge kok picak lah bisa di layang kan.iyo akan monjopuik datuak kami ko dalom prarik nen bolingka ko dalom aua nen bobarih suku soko Datuak ( Sebut nama Datuk tempat mamak Beristri ) monjopuik cucu komanaken dari Dt. Majolelo nen bo pulang ko rahmatulloh. Nen mano lah sakik sari duo hari sominggu duo minggu dicarikan ubek jo jampi, ubek nen indak monyonang ge jampi nen indo mo ubahi. Dicarikan juo sukatan padi, sukatan bilah nen bo buku, dicarikan juo nen sokondak hati, kondak tuhen juo nen bolaku. Turun lai kami ko halamen kami tompuah lobuah nen panjang lobuah luruih bak dibonang lobuah singkek siku bosiku jojak bajak monuriah lobuah pudiang omeh botimba jalen pudiang geni bo batng-batang aua cino bo rumpun-rumpun lah bajak jawi mo rusuak lobuah bo suluah matoari bo go langgang mato rang banyak nen tingga iyo bo sarang jauah nen di hadang hampie ke dokek nen dokek kinilah tibo kodalom parik nen bolingka aua nen bo barih ko dalom suku soko ( sebut nama datuak nen di hadang ), kami tompuah lamen posumandennyo lah kami topuak bondue nen molintang lah kami tingkek jonjang nen boanak lah duduak kami lantei nen bo bilah lah bosanda kami dindiang nen bobisik soroto disungkuik atok nen bo bangkauwen. Lah duduak kito so ampaern lah togak kito sopamatang lah tebang kami sopulun lah inggok kami sodahen kok inggok kami monikom tua lah tebang kami dari suku soko Dt. Majolelo hinggok kami ko suku soko ( sebut nama datuk yang di hadang ). Dolu kok datang iyo bo nampak muko kinin kok pulang nak bonampak pungguang. Iyo nak monjopuik cucu komonaken nen lah hilang kodalom parik nen bolingka kodalom aua nen bo barih kodalom suku soko Dt. Majolelo kok pintak nak pobuliah ge kok kondak nak dipolaku ge. Sokitunyo ompek suku.

 

IV. ALUA MINTO PULANG

Mo Mulang Carano

-       Niniak Mamak :

Ibubapo, mongecek kito sabuak manolah kecek tu singkek nyo, tapi somantang pun singkek mo nak disampe ge mangko jadi. Manolah kinin tu kok litak kami lah dapek maken kok hauih kami lah dapek aie. Jadi itulah pado malom kinin tontang nen korejo nen lah kito kakok. Kok cako Ibaret janji lah tibo di hari nyo ibaret sumbayang lah tibo pulo di wokotunyo. Tontang carano ken siriah lah sudah pulo gunonyo. Manolah kinin tu tontang carano ken siriah kok nen punyo sungguah lah Niniak dengan Mamak tapi nen mo impo bogubalo nyo iyolah Ibu dengan bapo. Nen kinin ko dek carano ken siriah lah sudah pulo gunonyo iyo nak di impou digubalo baliak dek ibubapo isuak tibo gunonyo dikolua ge pulo baliak. Sokitunyo ibubapo.

-       Sipangka :

Lah sampei tu Niniak Mamak, sopanjang titah Niniak Mamak kami iyolah rancak bunyi nen kami donga haluih rono nen kami liek tapi sungguah pun boitu lomak siriah lega carano lomak lauak ko pomasak lomak kato ko mufoket. Nak bulek ulek aie ko pombuluah nak bulek kato ko mufoket. Monanti Mamak kami sokotiko kami bao kato ko mufoket dolu kok siapo pulo lah beko ke momulang ge kato Niniak Mamak tu. ( maka mulailah ibu bapo bermufakat, setelah itu pulang kan kembali ). Niniak Mamak Kami, tolambek kami monjawek kecek Niniak Mamak. Buken mokusuik disongajo tapi moncari kato nen sopoket, manolah kinin tu lah dapek kato sopoket dari kami  sipangka ko aku juo ko monjowob kato Niniak Mamak kami tu nyoh. Manolah cako kok litak kami lah dapek nasi kok auih kami lah dapek aie, jadi manolah kinin tu tontang korejo nen lah kito kakok ibaret janji lah tibo diharinyo ibaret sumbayang lah tibo di wokotunyo. Tibo di carano ken siriah lah tibo pulo gunonyo. Manolah kinin tu kok nen punyo sungguahlah Niniak dengan Mamak tapi nen mo impou bogubalonyo Ibu dengan bapo. Jadi kinin lah sudah pulo gunonyo nak diimpou gubalo. Ken itu cako Niniak Mamak. Sotontang nen dari pado pinto Niniak Mamak , totatang carano ken siriah kok nenpunyo iyo Niniak dengan Mamak tapi mo impou bogubalonyo mo Ibu dengan bapo kinin tu lah sudah gunonyo kami impou gubalo pulo baliak.

 

Minto Pulang

-       Niniak Mamak.

Ibubapo mongecek kito sobuak, manolah nen ke dikecek ge do singkek nyo tapi somantang pun singkek mo nak disampei ge juo mangko jadi, manolah kinin tu jikok litak kami iyolah dapek nasi jikok auih kami iyolah dapek aie, kok nen didonga lah bobunyi kok nen pandang lah borupo, kok bolayie lah sampei kopulou kok bojalen lah sampei kobateh dibilang maken cakolah konyang dibilang minum cakolah sojuak rokok boisok pun lah bopanggang siriah sokapuapun lah bokunyah pinang sodidihpun lah bogotok. Kok nieklah sampei kaua lah lopeh, nen diangen lah jadi nen dimokosuiklah joleh nen di ama lah pocah. Manolah kinin bak papatah urang nen do olu.

Botiak mudo di tongah sawah

Anak itiak jalen bobarih

Lapiak nen tokombang lah basah

Rokok diisokpun lah abih

Iyo kinin tu kok duduak boraso ponek togak togak boraso poniang, buhua sungguah nen ke urak kobek sungguah nen ke di ungkei. Duduak do nak mourak selo togak nak molangkah ge kaki nak pulang ko rumah masiang-masiang nak dilopeh kami dengan hati nen suci muko nen joniah sokitunyo Ibubapo.

 

 

 

-       Rangtuo Sumondo

Lah sampei do mamak iyo bak nyo uarng tuo-tuo juo teh go, sobolum kato dijowob gayuang disambuik, dek kami disiko lailah togak nen samo tenggi duduak nen samo rondah bopariah kami dolu moncari kok siapo pulo beko nen komonjowob kato Niniak Mamak do. Mo monanti mamak kami sokotiko.

( Setelah dapat kata sepakat )

mamak kami

Sopanjang kato Mamak tadin tu ( di ulang kata tadi)ken itu cako do. Manolah dari kami kok duduak do olun ke boraso ponek lei togak do olun ke boaraso poniang, malom pun olun loruik le. Cuma dek mungkin lai pulo urusen nen lain beko jadi lahkami lopeh dengan hati nen suci muko nen joniah itu nen kami anta ge Niniak Mamak. Mak nampak putiah kapeh nampak diliek putiah ati boko ada en ko nyo. ( Berdiri menyalami semua yang hadir dalam helat tersebut )

 

 

Bungo Rampai

( Wanita harus dapat warisan dari nenek moyang )

Iduik batompek Mati bokubua

Kuburan hiduik dirumah godang

Kuburen mati ditongah padang

 

( Rumus adat Minang Kabau )

Kamanakan barajo ka mamak

Mamak Barajo ka Pangulu

Pangulu barajo ka mufakat

Mufakat barajo ka alue nan jo patuik

Alue jo patuik barajo ka nan bona

Nan Bna sasuai ajaran ugamo

 

( Persatuan )

Ibarat Aua ngen Tobiang

Saciok Umpamo Ayom

Sandanciang Umpamo Bosi

Kok anyuik dipinteh

Kok tarapuang di kaik

Kok tobonom disolom

 

( Batas nagari)

Basosok bajarami

Balabuah batapian

Barumah batanggo

Bakorong bakampuang

Basawah baladang

Babalai bamusajik

Bapandam pakuburan

 

(Parantau)

Karatau madang diulu

Babuah babungu balun

Marantau badan daulu

Dirumah paguno balun

 

Elok nagari dek pangulu

Elok musajik dek tuanku

Elok rumah dek bundo kanduang

Elok tapian dek nan mudo

 

Dek manuruik aliran jaman

Hanyuik dimaso tak mambenso

Runtuah budi lah caie iman

Manyimpang diadaik jo agamo

 

 

 

V. Penutup

Alhamdulillah, segala puji bagi Allah yang memberikan kesehatan dan kesempatan sehingga saya bisa menyusun sebuah buku ”PASAMBAHAN ADAT” untuk dipakai dalam acara adat didalam kampung. Mudah-mudahan dengan diterbitkan buku ini bisa menambah wawasan bagi masyarakat yang ingin menambah ilmu tentang ”PASAMBAHAN ADAT”. Untuk itu saya meminta kepada para sesepuh adat, buku ini jauh sekali kekurangannya jadi kalau ada yang tertinggal tolong ditambahkan saja dalam penghapalannya. Maklum, saya masih hijau dalam ”PASAMBAHAN ADAT” di bandingkan dengan sesepuh-sesepuh adat. Buku ini saya terbitkan setelah saya melihat keadaan ”PASAMBAHAN ADAT” kawula muda dikampung kita sudah mulai menurun bahkan hampir semua Anak Nagari tidak bisa sama sekali mengucapkan ”PASAMBAHAN ADAT” kalo ada acara adat dalam kampung. Oleh karna itu dengan adanya buku ini saya ingin menurunkan ilmu saya yang hanya seujung kuku ini kepada para pemuda dikampung ini. Semoga saja buku ini bisa menjadi mamfaat bagi kita semua terutama bagi saya,

 

Simpang Empat,24 Maret 2009

Imam Khatib Dt. Majo Lelo

 

                                                                                                Ttd

 

Hendri Caniago, S.AP